Esta fin de semana na que Pontevedra regresa á Idade Media a través da Feira Franca, o tempo responderá e favorecerá que todas as celebracións se celebren sen incidencias meteorolóxicas máis alá das posibles incomodidades vencelladas ao feito de que os termómetros cheguen ata os 33 graos de temperatura.
Segundo a previsión de Meteogalicia, xa desde este venres haberá ceos pouco anubrados ou despexados en xeral e as temperaturas serán altas para esta época do ano, con mínimas en ascenso moderado e máximas que chegarán ata os 33 graos nas Rías Baixas durante as xornadas deste venres e este sábado.
A xornada deste venres empezou cos ceos un pouco anubrados, pero irá despexando ao longo da xornada, de tal maneira que pola tarde dominarán o sol e as altas temperaturas. O sábado a previsión fala dun comportamento similar en canto ao tempo, con máximas de 33 e mínimas de 19 graos.
Xa de cara ao domingo, seguirán os ceos asollados e as Rías Baixas vivirán un remate de semana con calor, pero xa con temperaturas máximas máis suaves, de 30 graos. As mínimas serán lixeiramente máis elevadas, de 20 graos.
Durante a vindeira semana a inestabilidade atmosférica, por aire frío en capa altas, irá aumentando progresivamente e xa a partir de mediados de semana serán moi probables os chuvascos, sobre todo en zonas de interior.
As temperaturas sufrirán un paulatino descenso, especialmente nos últimos días da semana próxima.