A contaminación da auga, a perda do rural, o emprego en Pontevedra e a saúde mental. Son catro dos casos de estudo nos que nestas semanas profundan preto de 230 estudantes de ESO e bacharelato de cinco institutos pontevedreses.
Coordinado polos investigadores Brais Suárez e Cristina Míguez no proxecto de divulgación PostGrowth S.A. Pontevedra, desenvolvido con financiamento da Fundación Española para a Ciencia e a Tecnoloxía (FECYT), participan os institutos Luís Seoane, Valle-Inclán, Sánchez Cantón e Frei Martín Sarmiento, así como o CPR Los Sauces.
Trátase dun proxecto de ciencia cidadá, centrado nos "retos ecolóxicos e sociais que emerxen nas cidades do século XXI", sinalan os seus coordinadores, co obxectivo de facer partícipe o alumnado das diferentes fases dunha investigación, desde o seu deseño ata a presentación final.
Esta iniciativa tivo como punto de partida as propostas dos estudantes, que debía identificar aqueles "retos que consideraban importantes en dez anos para a cidade de Pontevedra".
Coa participación de once grupos de traballo, o proxecto desenvólvese ao longo de todo o curso con ata 467 retos propostos, dos que catro casos son levados a estudo.
En concreto a contaminación nas augas é a temática abordada polos tres grupos do IES Sánchez Cantón, mentres que a perda do rural é analizada por 49 estudantes de diferentes cursos do Luís Seoane.
O Valle-Inclán, que participa neste proxecto con cinco aulas, centra o seu traballo na saúde mental, mentres o emprego en Pontevedra é abordado tanto polo alumnado do Frei Martín Sarmiento como de Los Sauces.
Os resultados finais serán presentados na ESEE-Degrowth 2024, a Conferencia Internacional de Decrecimento que este grupo de investigación da Universidade de Vigo organizará en Pontevedra entre o 18 e o 21 de xuño.