O conselleiro delegado de CUF-Quimigal, Antonio Mesquita, compareceu este mércores en rolda de prensa para falar da "reconversión" da empresa Electroquímica do Noroeste S.L. asegurando que "queremos manter a actividade produtiva e comercial en Pontevedra".
Tres son os pasos que a multinacional portuguesa dará con este propósito, a presentación no Concello de Pontevedra dun borrador do plan especial de reforma interior (PERI) da fábrica para regularizar por completo a súa situación en Lourizán, a renovación "no último trimestre do ano" da Autorización Ambiental Integrada e tamén a solicitude de prórroga da concesión dos terreos.
O PERI é un trámite imprescindible para que a fábrica poida acometer o cambio á tecnoloxía de membrana, como esixe a normativa europea, abandonando o uso do mercurio na súa produción. Este cambio ten un custo estimado de "entre 35 e 40 millóns de euros" e un prazo estimado de dous anos.
O problema é que a documentación presentada por Elnosa "non se axusta ás determinacións do Plan Xeral", segundo informou a concelleira de Urbanismo, Carmen da Silva xa que a cloreira está excluída do amparo supramunicipal da Xunta, como si ocorre con Ence. Segundo o informe municipal o PERI que presentou a fábrica non figura no Plan Xeral de Ordenación Municipal que contempla un ámbito único para Ence, Elnosa, a depuradora e Mollabao.
"Urbanisticamente a situación actual imposibilita a súa permanencia", dixo Da Silva. A empresa ten un prazo de 10 días para emendar as deficiencias deste PERI.
Os directivos de CUF estudarán a resposta do Concello para continuar con este proceso xa que descartaron completamente o traslado da electroquímica a outra localización. Segundo Antonio Mesquita a "explicación é sinxela" o investimento necesario para construír unha nova fábrica "duplica o custo" da reconversión da actual. É dicir, sairía "entre 70 e 80 millóns de euros" o que é "inviable economicamente", segundo afirmou o conselleiro delegado de CUF-Quimigal.
"Fixemos o traballo, pero os números non pintan, non saen", declarou Antonio Mesquita.
Respecto da concesión dunha prórroga da concesión por parte do Goberno de España, o conselleiro delegado da multinacional lusa considera que "a prórroga de Ence facilítanos esta decisión" xa que entende que "non hai razóns para que eles consigan a prórroga da concesión e nós non". Esta tramitación está pendente de que Tribunal Supremo tome unha decisión sobre a caducidade do expediente da concesión.
Neste sentido Antonio Mesquita sinalou a "dispoñibilidade" da Xunta de Galicia "para oírnos e falar connosco" unha interlocución que non atopan no Concello de Pontevedra aínda que indicou que "non desistimos de tentar falar co alcalde, estamos a tentalo".
Mentres tanto anuncian unha serie de accións para abrir a cloreira á sociedade como a próxima firma dun convenio coa Fundación Rías do Sur.
RESPOSTA DO GOBERNO MUNICIPAL DE PONTEVEDRA
A tenente de alcalde e concelleira de Urbanismo, Carmen da Silva, asegurou en rolda de prensa que no goberno local "imos seguir traballando en todos os ámbitos" para que "Ence e Elnosa desaparezan da súa actual localización" en Lourizán.
Da Silva lembrou que Elnosa produce cloro e eslamiada cáustica "nunha contorna urbana" enmarcada na ría de Pontevedra e isto "non entra dentro dos parámetros que se esixen de localización industrial e nada que se lle pareza" e engadiu que os veciños "non teñen que seguir soportando o castigo de ver como a ría permanece degradada".
Finalmente, lembrou que Elnosa esgotou as moratorias que lle deron para adaptar a súa tecnoloxía "e agora toda a comarca temos que aguantar que como non lle dan os números ten que permanecer aí".