Trece meses e medio despois o conxunto escultórico dunha muller coas súas galiñas volve dar a benvida a todas aquelas persoas que visitan o mercado municipal e a rúa Serra.
Desde o 28 de xullo de 2023 estaba só a muller, pois un vehículo que estaba a realizar tarefas de carga e descarga na zona chocou coa escultura e rompeu as galiñas, pero este mércores 18 de setembro operarios municipais instalaron tamén os animais, tres galiñas e un galo.
Fontes municipais explicaron que as brigadas municipais procederon á instalación este mércores porque, aínda que as galiñas estaban xa reparadas antes, "esperouse a que pasase o agobio do verán" para a súa instalación.
Estas mesmas fontes indicaron que o arranxo das galiñas tivo "certa complexidade", por iso é polo que se demorou durante tantos meses.
Este conxunto escultórico da autora Cuqui Piñeiro está na rúa Serra desde o ano 2009. O deseño orixinal é de bronce e está integrado por unha muller, catro galiñas e un galo. Desde este mércores, están a muller, tres galiñas e galo.