A Garda Civil detivo dous irmáns, ambos de 42 anos e veciños de Tui, como presuntos autores dun delito contra a saúde pública tras ser localizados nun control na autoestrada AP-9 en Vilaboa con diversas cantidades de drogas.
Segundo a información facilitada pola Garda Civil, incautáronlles 2.850 doses de cocaína e 1.900 dose de haxix.
Foron detidos no marco dun dispositivo organizado por axentes da Garda Civil de Marín, en colaboración con efectivos de Moaña e a USECIC (Unidade de Seguridade Cidadá da Comandancia de Pontevedra) na área de servizo da AP-9 en San Simón, en Vilaboa.
A detención produciuse o pasado luns. Os gardas civís atopábanse realizando labores preventivos e detectaron un comportamento sospeitoso e evasivo dun vehículo con dous ocupantes.
Procederon a identificar aos dous ocupantes e a rexistrar o vehículo, onde acharon esta "cantidade notable" de cocaína e haxix.
Os detidos contan con antecedentes e numerosas infraccións relacionadas con consumo e tenencia de drogas e foron postos ao dispor do Xulgado de Primeira Instancia e Instrución número 2 de Cangas do Morrazo, que posteriormente lles puxo en liberdade.