O Entroido de Barro baixou o telón este domingo cunha xornada festiva que encheu a Nave da Música de humor e festa.
O Festival de Murgas, que chegou á súa sexta edición, e a tradicional queima do Corvo de Coralia deron fin a uns días de intensa celebración que este ano incorporaron novidades como o I Concurso de Filloas e Orellas.
O Festival de Murgas demostrou a súa consolidación ao completar a capacidade do recinto da Nave da Música. Os grupos do Equipo Já, do Naveiro e do Val do Lérez fixeron vibrar ao público con letras satíricas e actuacións cómicas que arrincaron gargalladas entre o público.
"É unha satisfacción ver como algunhas actividades xa están totalmente consolidadas, como o Festival de Murgas", destacou o alcalde de Barro, Xosé Manuel Abraldes, quen subliñou o crecemento que experimenta o Entroido do municipio ano tras ano.
O momento máis emotivo chegou coa cerimonia de despedida de Paco, o Corvo de Coralia, figura central do Entroido local.
O ritual previo á incineración foi conducido por José Antonio Rodríguez Riveiro, coñecido como "O Barbeiro", quen guiou unha cerimonia que mesturou bágoas e risas entre os numerosos veciños que se congregaron para dar o último adeus ao personaxe.
Entre as novidades que incorporou a programación deste ano destacou o I Concurso de Filloas e Orellas, unha actividade que reuniu ás mellores cociñeiras e cociñeiros do municipio arredor destes doces tradicionais do Entroido galego.
A iniciativa resultou un éxito tanto en participación como en degustación, "deixando un gran sabor de boca", segundo o Concello.
"A veciñanza acolleu moi ben as novidades que introducimos na programación e houbo un gran éxito de participación en todas elas", valorou o concelleiro de Cultura, Adrián Silva Magdalena, quen se amosou satisfeito pola resposta cidadá a todas as propostas.
