A autopsia practicada este mércores á muller de 84 anos cuxo corpo sen vida foi achado onte na súa vivenda do lugar de Acuña, en Vilaboa, non deixa lugar a dúbidas.
A octoxenaria faleceu de morte natural e non foi vítima de ningún tipo de acto violento.
Así o corroboraron os forenses do Instituto de Medicina Legal de Galicia, que se fixeron cargo do cadáver da falecida para tratar de aclarar as causas da súa morte.
A Garda Civil mantiña aberta unha investigación sobre este caso, xa que o médico que certificou a súa defunción concluíu que non se trataba dunha morte natural.
Fontes da investigación confirmaron que o corpo da vítima presentaba negróns, polo que as autoridades tiñan que aclarar se a súa morte fora froito dun accidente ou dun feito delituoso, pero finalmente non foi ningunha das dúas cousas.
Tras determinarse que o falecemento da anciá foi por motivos naturais, a Garda Civil pechará a investigación sen realizar máis dilixencias.