Dúas persoas resultaban feridas este mércores 8 de novembro nas proximidades da Ponte do Burgo na rúa Domingo Fontán ao ser atropeladas por un turismo.
Segundo a información facilitada pola Policía Local e o Concello de Pontevedra, o atropelo producíase arredor das 08.00 horas cando dous homes, de arredor de corenta anos, cruzaban a rúa por un dos pasos de peóns situado nas proximidades da gasolineira de O Burgo.
Unha das rodas do turismo pasáballe por riba do pé dunha das vítimas, mentres que a outra recibía un golpe como consecuencia do impacto co vehículo. Os dous homes foron trasladados ao Hospital QuirónSalud. Inicialmente o prognóstico das feridas non era grave.
Segundo as mesmas fontes, o condutor explicou aos axentes da Policía Local que non vira os peóns cando circulaba pola vía.