O presidente da Deputación de Pontevedra, Luís López, destacou o investimento de máis de 27 millóns de euros feita este ano na capital da provincia e os concellos da contorna (Barro, Campo Lameiro, Cerdedo-Cotobade, A Lama, Marín, Poio, Ponte Caldelas e Vilaboa).
O mandatario provincial fixo balance da acción de goberno no último ano nun almorzo informativo celebrado este martes no Museo de Pontevedra con medios de comunicación da capital e no que tamén participaron os deputados provinciais María Ramallo, Rafa Domínguez e Jorge Cubela.
Luís López enumerou os 2,5 millóns de euros en convenios co concello da capital. Ademais citou os 5,9 millóns en investimentos do plan +Provincia, os 500.000 euros no Plan de Infraestruturas Deportivas, os 1,5 millóns no PON2030. En actuacións en infraestruturas foron 5,4 millóns e outros 14 millóns de euros na cidade de Pontevedra.
Ademais, segundo sinalaron, a Deputación colaborou con 225.000 euros para apoiar 145 actividades ou entidades deportivas, e máis de 320.000 euros en apoiar preto de 450 entidades culturais e inxectou 640.000 euros para apoiar a 70 asociación veciñais ou comunidades de usuarios de augas.
Tamén foron 3,2 millóns en obras no Centro Príncipe Felipe para a súa modernización, 4,5 investidos no novo Parque de Maquinaria e tamén citou Luís López outras "accións de futuro " como a Bienal de Arte (1,1 millóns de euros) ou as obras previstas no Palacete das Mendoza (450.000 euros).
O vicepresidente Rafa Domínguez destacou que "nunca a Deputación investiu tanto en Pontevedra" con 14,7 millóns mobilizados en distintos proxectos como os dos viarios de acceso a Montecelo, de Mollavao ou Doce de Novembro, a renaturalización da Xunqueira de Alba, a reforma da Praza de Barcelos ou a redacción do proxecto básico de Santa Clara para converter o antigo convento na sétima sede do Museo.
Estes recursos, segundo manifestou, "desembocarán nunha Pontevedra con infraestruturas do século XXI". Rafa Domínguez considera que a Boa Vila "avanza para ser un referente cultural internacional" e faino "da man dunha institución provincial comprometida coas súas veciñas e veciños", dixo o vicepresidente.
Ademais destacou a lealdade e boa relación institucional existente co goberno local do BNG.
O proxecto de Santa Clara e a Bienal de Arte suporán un investimento da Deputación moito maior en Pontevedra, así como a interconexión dos edificios centrais do Museo de Pontevedra "ou o noso papel na organización dos Premios Feroz que auguran un 2025 prometedor", destacou o vicepresidente provincial.
Por último, Luís López puxo en valor o labor do seu equipo de goberno, facendo fincapé na importancia que teñen as áreas de Cooperación, Cultura e Mocidade e Reto Demográfico, que dirixen María Ramallo e Jorge Cubela.