Os sindicatos con representación no Centro Penal A Lama (ACAIP, CCOO e ATP) informan novamente de varios feitos violentos no interior da prisión.
Esta vez resaltan dous episodios deste tipo, o primeiro deles a finais do mes pasado cando unha interna ao ser trasladada ao departamento de enfermería atacou violentamente a varias funcionarias causándolles lesións de diversa consideración. Ante tales feitos a citada interna foi reclasificada en primeiro grao (o réxime de vida máis restritivo na prisión) e trasladada a outro penal do estado.
O segundo dos episodios violentos produciuse o 9 de xullo, esta vez no departamento de illamento onde uns dos internos máis perigosos, clasificado por iso en primeiro grao, fíxose forte nunha das galerías do departamento e tiveron que entrar varios funcionarios. Como consecuencia diso producíronse varios lesionados atopándose nestes momentos un dos funcionarios de baixa laboral por tales feitos.
Segundo os representantes sindicais "estes episodios non son novos na prisión" e veñen motivados "pola falta de persoal que hai no establecemento" unha situación que vén sendo denunciada os sindicatos sucesivamente.
Agora apuntan que a situación empeora na época estival ao ter vacacións o persoal xa que "hai funcionarios que están a duplicar servizo en varios módulos do centro e noutros casos onde tería que haber dous funcionarios de servizo só atópase un deles operativo".
Ante tales feitos critican que a Secretaría Xeral de Institucións Penais "segue sen dar resposta e a situación de falta de persoal, con xubilacións recentes, intensifícase".
Estes sindicatos estiman que as necesidades de persoal son duns 50 efectivos para os traballos de vixilancia. Dáse a circunstancia de que nestes momentos atópanse no centro, a nova promoción de funcionarios da oferta de emprego público do ano pasado (25 efectivos) realizando o obrigado curso formativo do proceso selectivo.
Destes efectivos só quedarán no penal pontevedrés seis aínda que non se sabe se completarán os 18 meses de prácticas ou serán trasladados a outros centros de recente apertura, como paso na anterior promoción, que foron trasladados aos dous meses do comezo das prácticas.
Desde ACAIP, CCOO e ATP felicitan a actuación e profesionalidade do persoal en tales feitos "e esiximos aos nosos xestores que se adopten as medidas necesarias para salvagardar a seguridade do persoal penal da Lama". Ademais, denuncian que o protocolo contra as agresións é unha "mera declaración de intencións" e que non aborda os problemas estruturais que se xeran nos centros.
Así ven con preocupación a "escalada de violencia que sufrimos na prisión da Lama e volvemos denunciar a escaseza de persoal e o envellecemento do persoal como posibles causas".
Tamén hai que ter en conta as patoloxías psiquiátricas que esconden moitos destes comportamentos violentos e a "deficiente ou escasa preparación que ofrece a administración de como é o actuar ante tales patoloxías" ademais, consideran que moitos destes internos están aloxados en módulos das prisións "sen ter en conta esas patoloxías cando en realidade terían que estar en psiquiátricos penais". Actualmente só existen dous establecementos desta clase, Sevilla e Alacante.
CCOO, ACAIP e ATP demandan medidas activas urxentes, unha oferta de emprego público extraordinaria e un plan integral contra as agresións ao persoal penal "digno" que "garanta a saúde laboral", así como solucións inmediatas para que a agresión no Centro Penal da Lama sexa a última.