Dous novos ámbitos urbanos integraranse na cidade de Pontevedra se frutifican, esta vez, os plans do ministerio de Defensa. Trátase das vivendas militares de Xeneral Rubín e da contorna do colexio Salvador Moreno.
O Instituto de Vivenda, Infraestrutura e Equipamento da Defensa (Invied) dirixiuse ao Concello de Pontevedra para desbloquear un convenio cuxa tramitación comezou no ano 2008 e que quedou en suspenso hai uns anos por cambios no organismo gobernamental.
A edil de Urbanismo, Anabel Gulías, explicou que a tramitación desta iniciativa, que inclúe a modificación puntual do plan en vigor, deberá iniciarse desde o principio, debido aos cambios lexislativos que se aprobaron nos últimos anos a este respecto.
Este trámite permitirá, por unha banda, que se abra a posibilidade de que os actuais inquilinos destas vivendas militares poidan comprar estas propiedades.
A cambio, abrirase á cidade este espazo, ata agora de uso militar e que conta cun peche para aparcadoiro dos residentes na zona, como un viario para uso público. Ademais, farase unha reforma integral de toda a zona e crearanse novas prazas públicas.
Os 750.000 euros que custará esta reurbanización asumiraos o propio Invied que, ademais, cederá ao Concello dous locais -duns 340 metros cadrados en total- na esquina de Xeneral Rubín con Fernández Ladreda para que habilite neles un centro social.
Os técnicos do Invied xa se reuniron cos do Concello para avanzar na tramitación deste convenio e desde o goberno municipal aseguran que tentarán axilizar este proxecto ante o interese que ten para a cidade.
Anabel Gulías explicou que a integración destas dúas zonas na malla da cidade será " moi positiva" para todo este barrio. Unha vez acondicionado todo este ámbito, deixará de depender do ministerio e quedará baixo a tutela do Concello.