Dotar a empresarios e comerciantes da cidade de diferentes ferramentas para suavizar "no posible" o golpe da crise do coronavirus. É a proposta que, en materia económica, fai o Partido Popular ao goberno municipal de Pontevedra.
A este respecto, o edil Pablo Fernández suxeriu a posibilidade de crear unha marca local que facilite aos clientes identificar os produtos que son fabricados e vendidos polos comerciantes locais, de forma que poidan apostar por eles.
Esta iniciativa, segundo os populares, foi compartida coas asociacións AMPE, AJE, Cámara de Comercio, Foro Empresa e APE, cos que o edil do PP mantivo contacto de maneira telemática.
Ademais de apostar por unha economía circular, Fernández tamén propón traballar cara ao impulso dunha central loxística a través da que o comercio local poida distribuír os seus produtos a través de Internet.
O concelleiro popular entende que as decisións que se adopten neste momento terán un "efecto directo" na saúde das empresas pontevedresas.
Por todo iso, Pablo Fernández ofreceuse a "axudar e achegar todo o que poida" á concellería de Promoción Económica e valorou "positivamente" apostas como a plataforma #PonteLovers, posta en marcha recentemente.