Nova protesta dos traballadores de Ambulancias Civera, empresa concesionaria do servizo de traslados non urxente de ambulancias na área sanitaria de Pontevedra e O Salnés, contra a "nefasta" xestión da compañía.
Este xoves concentráronse diante das consultas do Hospital Provincial para denunciar a súa situación laboral e anunciaron que, a non ser que antes do vindeiro mércores 17 teñan un compromiso formal coas solucións que demandan, seguen adiante os paros de 24 horas convocados para esa xornada e tamén os días 24, 26 e 30 de abril e 2 de maio.
"Ten que haber unha garantía por escrito", aclarou Xabier Aboi, representante da CIG. Se non chega ese acordo, o día 17 terán a primeira xornada de paro.
Para desconvocala, antes do mércores teñen que pagarlles o débeda salarial de 2024 e "o luns, como máximo" terán que empezar a discutir a débeda de 2023.
Esa garantía ten que supoñer que o día 1 de maio se aplique a subida salarial recollida no convenio. "Iso te que quedar clariño".
Ademais, será necesario que quede por escrito que se cumprirán os acordos firmados relativos a descansos, vacacións e o calendario laboral, pois "están poñendo problemas cada día".
Se a empresa cumpre estas condicións, ese mesmo día quedaría desconvocanda a folga, pero non se fían, pois consideran que "perdeuse unha semana" porque a empresa está "escondida".
Así, critican que hai unha nova reunión e a empresa acude de xeito telemático. "Como alguén pode solucionar este conflito telematicamente? Hai cousas que hai que solucionalas en persoa", cuestiona Aboi.
A actualización salarial do convenio suporía unha media de 150 euros por cada unha das 90 persoas contratadas, toda a empresa entre as sedes de Pontevedra e Vilagarcía.
Ademais de denunciar os constantes incumprimentos da empresa no que ten que ver co abono de salarios conforme ao convenio e aos acordos pactados, a concentración tamén serviu para criticar a falta de mantemento dos vehículos, os incumprimentos do concurso, a falta de roupa de traballo e de EPI ou a ausencia de recoñecementos médicos obrigatorios dende o comezo da concesión.
Xabier Aboi insiste en que a situación desta empresa "só a soluciona o novo concurso que hai meses que ten que saír, pero están atrasando". Nestes momentos "xa non é posible rescindir o contrato, desgraciadamente", por cuestións burocráticas, sinala o representante da CIG, así que piden que se axilice ese concurso.
"Non pode seguir esta empresa un minuto máis despois do próximo concurso", insisten. A solución é que se adxudique a outra empresa porque, segundo sostén o representante da CIG, tamén afectan á cidadanía.
"A atención cada vez é peor", sostén Aboi. Por exemplo, indican que hai "moitos días" que teñen que facer un traslado dun paciente da UCI a outro centro hospitalario e "non hai balas de osíxeno" e teñen que ir recollelo aos hospitais Montecelo ou Provincial.