Antes de que termine este domingo, Pontevedra terá un novo alcalde. Poderá ser o mesmo que chega gobernando a cidade durante as últimas dúas décadas ou ben algunha das persoas que encabezan as outras oito candidaturas presentadas nesta cita coas urnas.
A decisión está en man dos 66.927 pontevedreses que este 26 de maio teñen dereito ao voto para elixir o seu alcalde para o próximos catro anos.
As enquisas publicadas ata agora, tanto por La Voz de Galicia como por Faro de Vigo, sitúan ao nacionalista Miguel Anxo Fernández Lores como o máximo favorito á vitoria. A este médico de profesión de 65 anos, alcalde de Pontevedra desde 1999, sitúano mesmo ao bordo dunha posible maioría absoluta.
Fronte a el, o PP apostou por outro médico. Trátase de Rafa Domínguez, cuxa traxectoria política comezou hai catro anos como edil da oposición. Casado e cun fillo, aos seus 43 anos preséntase como a alternativa ao goberno do BNG e renovou a case toda a candidatura popular que presentara o seu predecesor, Jacobo Moreira.
Os socialistas, pola súa banda, volven confiar no seu candidato de 2015. Tino Fernández, avogado de 58 anos con dous fillos, espera que o 'efecto Sánchez' permita ao PSdeG-PSOE mellorar os seus resultados electorais, tras oito anos estancados cunha representación de tres edís na corporación municipal.
Marea tamén apostou de novo polo seu líder en Pontevedra, o escritor e xornalista Luís Rei, que aos seus 61 anos, optará por segunda vez á Alcaldía da cidade. Nesta ocasión farao arroupado por Teresa Casal, tenente do alcalde co PSOE entre os anos 2003 e 2011, e convencido de que aumentará a súa presenza na política local.
O que si cambiou de cartel electoral foi Cidadáns. Tras catro anos con María Rey á fronte, os de Albert Rivera decidiron substituíla por un dos seus estreitos colaboradores, Goyo Revenga. Empresario e dono dunha óptica en Pontevedra, ten 58 anos. Casado e con dous fillos non se conforma con manter a acta de concelleira que o seu partido ten na cidade.
Dous partidos que se presentan por primeira vez en Pontevedra, Podemos e VOX, auspiciados pola súa potente marca nacional, e outro que repite catro anos despois aínda que estreando candidato, Compromiso por Galicia, pelexarán tamén nas urnas por lograr o seu primeiro edil na corporación da cidade do Lérez.
O partido que dirixe Pablo Iglesias, integrado ata agora en Marea Pontevedra, presenta ao seu coordinador na cidade, José Ramón Otero, á fronte da súa coalición con Esqueda Unida. O seu gran reto, que os electores diferencien o seu proxecto da marea local.
VOX, mentres tanto, apostou por un alto funcionario do Concello de Pontevedra, Manuel Torres, que chegou a exercer como xefe dos Bombeiros de Pontevedra pero ata agora sen experiencia política, como a súa cara visible na cidade.
O enxeñeiro técnico agrícola Andrés Núñez Rajoy, funcionario de Medio Rural, é a opción de Compromiso por Galicia. Converteu a súa ampla colección de chapeus e paxarelas que lle acompañan en todas as súas aparicións públicas en todo un símbolo para este partido que, sen dúbida, protagonizou a campaña máis peculiar.
Un cuarto partido sen presenza ata agora en Pontevedra, Cidadáns por Galicia -sen ningunha relación co partido de Albert Rivera- completa a terna de candidatos á Alcaldía. Presenta a Roberto Quinteiro, enxeñeiro da Universidade de Vigo e encargado de seguridade segundo o seu perfil en redes sociais.
RESULTADOS EN 2015
