Pontevedra será sede en setembro de 2022 da Placemaking Week Europe, segundo confirmou este martes a concelleira de Promoción da Cidade, Anabel Gulías, acompañada do director de Placemaking Europe, Ramón Marrades.
Trátase dun evento que reunirá na cidade a 400 expertos en urbanismo sostible "de todo el Mundo, especialmente Europa pero también de Estados Unidos o Asia", sinalou Marrades.
A organización, cuxo congreso anual celebrouse previamente en Ámsterdam, Estocolmo e Valencia ademais dunha edición reducida en Barcelona, elixiu á Boa Vila por ser "un referente en el urbanismo a escala humana en Europa" pero mantendo "ganas de dar un paso máis".
A concesión do congreso supón, para Anabel Gulías, "avanzar un chanzo máis na referencialidade internacional de Pontevedra".
Tal é a importancia desta semana europea que "estamos falando de destinar a parte máis ampla do orzamento de promoción da cidade do próximo ano", confirmou a edil entendendo que se trata de "un dos eventos máis importantes aos que se enfronta Pontevedra nos últimos anos".
No mesmo, ademais de temas internacionais e pautas xerais haberá espazo para discutir tamén proxectos locais que se poidan acometer na cidade "como pode ser o caso de Monte Porreiro que precisa unha ollada nova", sinalou Gulías.
Máis aló da chegada durante a semana europea de expertos e profesionais en deseño urbano, mobilidade, educación ou saúde pública, a fundación Placemaking Europe traballará a partir de agora estreitamente e durante todo o ano coa cidade para preparar a cita.