Un total de 173 comunidades de usuarios de auga de 43 municipios pontevedreses recibiron este luns axudas da Deputación Provincial de Pontevedra no marco do programa +Aqua, que reparte 1,6 millóns de euros.
O presidente da Deputación, Luis López, e o deputado Javier Tourís participaron no acto de entrega dos documentos acreditativos das axudas deste programa "pioneiro para recoñecer o labor destas comunidades veciñais".
López pon este proxecto como mostra do compromiso da institución provincial para mellorar os servizos básicos, da cooperación cos colectivos veciñais e do apoio á sustentabilidade e coidado do medio ambiente.
Así, lembrou que "sen auga non podemos vivir" e "por sorte vivimos nun territorio onde a temos en abundancia". Para facela chegar ata as cidades ou aldeas, o abastecemento "non sempre é doado e mesmo pode resultar moi custoso nalgúns casos" e aí entran en xogo as comunidades de auga.
+Aqua púxose en marcha este ano por primeira vez para repartir subvencións que oscilan entre os 6.000 e 10.000 euros.
Van destinadas a proxectos relacionados coa mellora das infraestruturas e instalacións de auga comunitaria; implantación de sistemas de dixitalización e eficiencia enerxética; modernización dos sistemas de tratamento; legalización das novas concesións ou renovación das existentes; ou a mellora das captacións e sistemas de almacenamento.
A convocatoria resultou un éxito de participación, ao recibir máis de 264 solicitudes, das que 208 foron aprobadas e 35 mantéñense en lista de agarda ao esgotarse o crédito previsto.
Tourís, responsable do departamento de Acción Comunitaria, sinalou que este plan "pon o acento na xeración de sinerxías positivas", sobre todo no rural, e "responde ao novo modelo de xestión na Deputación".
