"Atención, cidadáns de Pontevedra, escoiten o que imos dicir. É a realidade de moitos nenos desta cidade". A frase ecoou este luns, coa voz distorsionada, no exterior da Audiencia Provincial de Pontevedra. Mentres soaba, un grupo de persoas concentrábase co rostro tapado e carteis denunciando violencia vicaria e institucional.
É unha máis das concentracións que nos últimos meses realizaron familias e amigos de nais que denuncian esta violencia e a aplicación da "falsa" Síndrome de Aliñación Parental (SAP) en casos de custodias dos seus fillos menores. Nesta ocasión, optaron por trasladarse ata a Audiencia, tras pasar xa polos xulgados da Parda en semanas pasadas.
Ata a rúa Rosalía de Castro trasladáronse persoas chegadas de distintos puntos da provincia que optaron por taparse a cara para preservar a súa identidade e portaron pancartas de protesta con mensaxes cos que apelan á sensibilidade e empatía cidadá. "Como te sentirías se cando eras pequeno te separaran da túa nai á que queres e te obrigaran a vivir co teu pai maltratador?", preguntaba un.
Estas familias lanzan varios SOS, a maioría destinados a que non se aplique o SAP, pero tamén outros pensando na situación que viven os menores. "Pontevedra está a quedarse con nenos orfos de nai e nais orfas dos seus fillos. SOS" ou "SOS. Xa abonda de tortura institucional a nais e fillos/as".
Con esta concentración apelan á cidadanía en xeral, con mensaxes que buscan que se poñan no seu lugar. "A vostedes alguén lles quitou á súa nai? O interese superior do menor non é romper o vínculo materno", "Están a roubar a infancia aos nosos fillos/as. A cambio de que?", indican nas súas mensaxes.
Tamén se dirixen aos xuíces e fiscais pontevedreses e centran as súas críticas nos informes do Imelga, dos Puntos de Encontro Familiar (PEF) e dos Gabinetes de Orientación Familiar, que aplican os postulados do SAP. "PEFs, GOFs e Imelga “diagnostican” síndromes inexistentes e prohibidas (SAP) e os xulgados utilizan os centros de menores para aplicar a “terapia” (da ameaza). O negocio do sistema. SOS", cuestional.
"Os nosos fillos/as son iguais aos seus. Deixen de destruír infancias", pediron ante a Audiencia Provincial, denunciando "secuéstranse nenos /as ben coidados polas súas nais e intérnanse en centros de menores, aplicando o SAP prohibido por lei".
Algunha pancarta estivo máis personalizada, como a dunha avoa que lamentaba "levo 4 meses sen ver á miña neta Nerea. Xustiza" e, para interpelar á conciencia cidadá, tamén incluíron as voces distorsionadas de nenos lamentando que lles separaran das súas nais, en moitos casos, con menores que acaban en centros de menores sen que as súas nais saiban onde están nin poidan ter contacto con eles.
De fondo, mentres durou a concentración, leuse un manifesto no que explicaron que que é o SAP, "unha síndrome inexistente e sen aval científico que se utiliza nos xulgados para desacreditar sempre sempre ás nais en procesos de custodia, sendo moi utilizado polos avogados que defenden aos pais cando hai denuncias previas por abuso ou malos tratos cara aos fillos".
O manifesto que se leu denuncia que "a parte que defende ao pai culpa ás nais de que os fillos e fillas non queiran estar co pai porque din que a nai os manipula á súa antollo coma se estas tivesen un mando a distancia ou os nenos fosen robots programables, tentando ocultar, así desta maneira, o verdadeiro motivo do rexeitamento dos fillos cara aos seus proxenitores, que son sempre ausencias paternas nas que non houbo ningún vínculo, malos tratos cara á nai ou os propios, fillos ou abusos sexuais".
Lembran que a ONU chamou a atención a España por seguir utilizando esta síndrome na súa resolucións xudiciais e cuestionan que "parece ser que os xulgados de Pontevedra non se coñece a inexistencia da síndrome", pois se segue utilizando, ás veces sen nomealo e outros chamándolle "interferencias maternais", "obstaculización materna", "falta de colaboración das nais".
Neses procesos de custodia, piden aos xuíces e fiscais que escoite aos nenos "cando se toman decisións que incumben ás súas vidas" e alertan de que "se están facendo auténticas aberracións separando a nenos e nenas das súas nais coas únicas que tiñan un vínculo e un apego seguro".