A Deputación de Pontevedra recibiu este ano de preto de 190 traballos para optar aos Premios Provinciais á Xuventude, un dato que supón o récord de prescricións na historia destes galardóns.
En total, son 80 traballos máis que os presentados na edición anterior, cando foron 108 os proxectos presinscritos.
Todos eles poderán optar a un total de 36.000 euros en premios distribuídos en once categorías diferentes que buscan recoñecer o talento e potencial da xuventude, estimular e recoñecer a súa traxectoria, o seu esforzo e compromiso, así como labores relevantes que promovan en distintos ámbitos.
En concreto, recibíronse 56 propostas na categoría de fotografía orixinal, 37 en traballo literario breve, 19 en deseño e moda, 15 en investigación, 14 de contido audiovisual, 11 de iniciativa empresarial, 10 de banda deseñada, 9 traballos musicais, 8 na categoría de educación en valores, 7 en reacción polo clima e 2 iniciativas estudantís, convocada neste 2024 por vez primeira.
Agora, as persoas solicitantes deberán presentar os seus proxectos definitivos antes do 19 de agosto.
En xeral, a estes Premios Provinciais á Xuventude podían presentarse persoas de 16 a 35 anos empadroadas na provincia de Pontevedra, se ben nas categorías de iniciativa empresarial e de reacción polo clima tamén podían concorrer persoas xurídicas nas que polo menos un 75% da xunta directiva ou dos administradores teñan esa idade.
Nesta última, ademais, tamén podían presentarse centros de Educación Secundaria en cuxos proxectos participe alumnado de idades comprendidas entre os 12 e os 18 anos, aos que tamén estaba dirixida a categoría de educación en valores. Nesta categoría o importe do premio deberá destinarse na súa totalidade á adquisición de material, a saídas educativas, a proxectos escolares, a bolsas para o alumnado ou a calquera outra actividade que teña relación directa coa programación do centro.