Centos de persoas deixáronse conquistar pola troita este domingo en Ponte Caldelas. O posto de degustación instalado na Alameda desde o sábado despachou o prato estrela da Festa da Troita durante toda a xornada, preparado fritido e en escabeche.
A xornada estivo marcada tamén polos premios, como colofón ao Concurso Internacional de Pesca Deportiva da Festa da Troita, organizado pola Sociedade de Caza e Pesca Verdeseixo coa colaboración do Concello de Ponte Caldelas durante toda a fin de semana.
O acto de entrega de premios tivo lugar este domingo ás 13.00 horas na Alameda de Ponte Caldelas conducido pola concelleira Aurora Garrido e coa participación do alcalde, Andrés Díaz, os concelleiros Enrique Vidal, José Manuel Garrido, Inés Garrido e Pilar Couto; o delegado de Pesca de Verdeseixo, Santiago Pérez, o vicepresidente de Verdeseixo, Manuel Iglesias; e o tesoureiro da entidade, Jesús Garrido. Tamén estiveron no acto o sarxento da Garda Civil de Ponte Caldelas, Javier Márquez, e a deputada de Turismo na Deputación, Ana Laura Iglesias.
O gañador do concurso foi Antonio Lorenzo Freitas, da Sociedade de Caza e Pesca Verdeseixo, que se fixo co primeiro posto da categoría sénior ó acadar a maior puntuación por capturas. Para el foi a troita de prata que o recoñece como gañador desta edición do concurso.
O segundo posto foi para Luis Esperón Pérez (Verdeseixo) e o terceiro para Manuel Alfonso Fontán (Verdeseixo).
A troita máis grande acadouna Manuel Alfonso Fontán (Verdeseixo) que capturou un exemplar de 33 centímetros.
Na categoría de sociedades o primeiro posto foi para a Sociedade de Caza e Pesca Verdeseixo, o segundo para o Club Carballedo e o terceiro para o Club de Caza e Pesca Padrón. En veteranos todos os premios foron para o club Rio Ulla: o primeiro posto acadouno Manuel Mariño Varela, o segundo Raúl Mariño Teira e o terceiro Ramiro Rey Casais. Na categoría feminina gañou Nieves Iglesias Carrera (ADN Ribadavia) e o segundo posto foi para Nieves Salgueiro Martínez (Verdeseixo).
Na categoría xuvenil triunfou Ángel Blanco Falcón, o segundo posto foi para Fabián Eiras Torrado e o terceiro para Iago Fraga Ricoy. Na categoría infantil gañou Iván Moledo Amoedo e seguírono Martín Lorenzo Salgueiro e Ainara Estévez Peleteiro.
A xornada de domingo tamén contou coa música da Banda de Música de Meaño, que fixo o tradicional pasarrúas e que ofreceu un concerto na Alameda. O día rematou coa terceira xornada do I Festival Troita Folk, que contou cunha sesión de cantos de taberna cos grupos Catro Ventos de Ponte Caldelas e Cantanascroas de Salcedo.