A intervención dos funcionarios da quenda de noite do 15 de xullo foi decisiva para sufocar o incendio que se provocou nos contedores de residuos, que se atopan instalados nunha das rúas interiores do Centro Penitenciario da Lama, entre os edificios residenciais que ocupan os internos.
O persoal foi alertado grazas aos detectores de fume do inicio do incendio. A partir dese momento, segundo informan desde o sindicato ACAIP-UXT, activouse o protocolo antiincendios e, a través dos extintores, sufocaron o lume e refrescaron a zona con auga, evitando que se propagase ao resto de contedores.
Sinalan desde o sindicato que o abundante fume entraba polas xanelas dos módulos residenciais pero constatouse que ningún dos internos sufría problemas de saúde.
Segundo as investigacións realizadas, o lume provocouse mediante obxectos incendiarios lanzados desde as xanelas das celas. A investigación continúa aberta pero, segundo os primeiros indicios, os artefactos lanzados foran elaborados con materiais como papel hixiénico, botellas de plástico e calcetíns, a modo de cóctel molotov.
Este novo modus operandi causou alarma entre o persoal funcionario e os internos ante o perigo que supón esta acción e as motivacións que o provocaron. Segundo o sindicato maioritario na prisión, ata agora os incendios orixinados por reclusos iniciábanse ao prender lume aos colchóns que se atopan nas celas, co obxectivo de aproveitar a confusión para xerar un altercado.
ACAIP-UXT lembra a escaseza de funcionarios no centro penitenciario e alerta das dificultades que tería unha dotación de Bombeiros en chegar a tempo para intervir nun incendio nestas instalacións se o persoal vese incapaz de sufocalo.