Este venres 18 de outubro inaugurábase o Centro de Atención Social Continuada San Roque de Cáritas Interparroquial de Pontevedra.
Unha iniciativa que busca ofrecer un espazo digno e asistencial durante todo o día para as persoas sen fogar.
O acto foi presidido polo Arcebispo de Santiago, Monseñor Francisco José Prieto, e contou coa participación da conselleira de Política Social e Igualdade, Fabiola García, así como do alcalde de Pontevedra, Miguel Anxo Fernández Lores; o director de Cáritas Interparroquial de Pontevedra, Juan Carlos Abeigón; e a directora de Cáritas Diocesana de Santiago de Compostela, Pilar Farjas.
A directora de Cáritas Diocesana de Santiago de Compostela, á que pertence Cáritas Interparroquial de Pontevedra, destacou que este centro é parte dun ambicioso proxecto que inclúe o xa en funcionamento Albergue San Javier e unha futura vivenda especificamente para mulleres, a Casa de Acollida Santa Ana.
"A nosa aposta é clara: crear unha contorna onde as persoas sen teito poidan residir, vivir e ser acollidas durante o día", indicou Farjas.
O Centro de Atención Social Continuada San Roque non só ofrecerá un lugar onde os beneficiarios poidan estar durante o día, senón que tamén dará acceso a duchas, internet, zona de estar, lavandaría, comida e apoio social.
Actualmente, estímase que 70 persoas se beneficiarán dos servizos combinados do Albergue San Javier e o centro recentemente inaugurado.
O perfil dos usuarios neste centro evolucionou nos últimos anos, pasando de homes principalmente galegos ou españois a acoller a un crecente número de mulleres e persoas estranxeiras ao redor dos 40 anos de idade.
Con esta iniciativa preténdese contribuír a dignificar a vida daqueles que máis o necesitan, traballando para que cada individuo teña a oportunidade de reconstruír a súa vida desde a base.
"O máis difícil é ofrecer oportunidades para que as persoas poidan recuperar a súa autonomía e dignidade", explicaba Pilar Farjas, quen salientou o compromiso de Cáritas en axudar a estas persoas a reintegrarse social e laboralmente.
A nova instalación contará coa atención de máis de 20 voluntarios, así como educadores e terapeutas que traballarán en conxunto para facilitar a recuperación das súas vidas.
Mauro Lomba é o arquitecto autor do proxecto destas instalacións da rúa Joaquín Costa 64 (Pontevedra), que acollen o albergue San Javier e o centro San Roque.
Nesta infraestrutura, Cáritas investiu case millón e medio de euros. A previsión é que para a última fase, correspondente á vivenda de Santa Ana, se destine medio millón de euros.