A Policía Local de Pontevedra vén de realizar unha campaña de control e vixilancia da utilización do cinto de seguridade e outros sistemas de retención homologados.
En total, foron controlados 1.915 vehículos, entre turismos, taxis, autobuses e de mercadorías.
Desde o corpo de seguridade municipal, sinálase o "altísimo grao de cumprimento nas normas de seguridade viaria" ao redor deste elemento, que se amosa como unha "ferramenta indispensable á hora de salvar vidas ao volante" ou como pasaxeiro.
Así, dos 1.915 condutores, só 3 foron detectados sen cinto. Nos tres casos eran condutores de turismos e non de vehículos profesionais.
Ademais, no referido a pasaxeiros, dos 782 acompañantes na parte dianteira, só dous ían sen cinto; e na parte traseira, catro de 338 pasaxeiros (sempre en turismos privados, tamén).
Tamén se controlaron os sistemas de retención infantís, dianteiros e traseiros.
Dos 247 que se detectaron, ningún incumpría coa norma de estatura e peso.
A campaña tivo lugar entre os días 10 e 16 de marzo deste ano.
Como é habitual, está prevista a realización de máis accións deste tipo para velar pola seguridade de condutores e pasaxeiros e traballar na divulgación da seguridade viaria.
