A área sanitaria de Pontevedra e O Salnés rexistra este venres, 16 de outubro, un total de 401 casos activos, 18 menos que no día de onte. Uns datos que permiten manter a tendencia positiva dos últimos días, con cincuenta altas tramitadas na última xornada, a pesar de que se confirmaron 32 novos contaxios.
Nos hospitais da área permanecen ingresados 14 pacientes, dos que 11 están en Montecelo e 3 no Salnés. Así mesmo, dúas persoas continúan ingresadas na Unidade de Coidados Intensivos do centro hospitalario pontevedrés. O resto de contaxiados, un total de 385, continúan evolucionando nos seus domicilios.
O número de curados tamén mellora con cincuenta novas altas e sitúase xa en 2.090 desde o inicio do plan de continxencia da covid-19. Doutra banda, o número de pacientes falecidos na área sanitaria de Pontevedra e O Salnés é de 25 pacientes.
Nas últimas 24 horas, os profesionais do Sergas realizaron 541 test PCR, que engrosan a cifra de 52.918 realizadas desde o inicio da pandemia no norte da provincia.
No nivel 2 permanecen Pontevedra e Vilagarcía, así como Poio pola tendencia crecente dos últimos 7 días.
Un chanzo por baixo nesta clasificación sitúanse os concellos de Marín, Sanxenxo, Caldas e Vilanova de Arousa.
DATOS LOCAIS
- Marín: A Consellería de Sanidade comunicou este venres que no municipio permanecen activos 35 casos, tres menos que na última xornada.
- Vilanova de Arousa: hai 19 casos activos, un máis que o xoves.
- Poio: 27 casos activos, dous máis que o xoves.