Os servizos de emerxencia despregaron un dispositivo de procura no río Lérez para localizar o piragüista de 49 anos desaparecido tras envorcar a súa embarcación.
Foi un particular que estaba a correr pola Avenida de Domingo Fontán, pouco despois das doce do mediodía, o que viu como caía o piragüista na zona do río entre a Ponte das Correntes e a gasolineira do Burgo.
Segundo esta testemuña, nun primeiro momento o piragüista logrou agarrarse á embarcación pero acabou afundindo no río.
O deportista pertence ao Club Naval de Pontevedra, cuxos membros están a participar activamente no dispositivo de procura que se activou para localizalo.
Tamén chegou a afundirse parcialmente a piragua baleira, que posteriormente foi recuperada polos bombeiros que a trasladaron ao pantalán do Club Náutico.
Neste operativo de procura, ademais dos bombeiros de Pontevedra que peitean o río cunha das súas embarcacións, participan axentes da Policía Nacional, a Policía Local e a Garda Civil. O 112 tamén avisou ao servizo de Salvamento Marítimo.
Os traballos para tratar de rescatar ao deportista víronse dificultados ante as intensas choivas que están a caer sobre Pontevedra, que fan que a auga do río baixe turbia.