Os eventos para que as festas sexan compartidas entre a cativada e as persoas maiores serán os protagonistas na programación "ampla e variada" que, segundo a concelleira de cultura, Carmen García, preparou o Concello de Bueu para estas festas de Nadal.
Será un programa cheo de propostas culturais e deportivas das que toda a veciñanza poderá gozar entre o 7 de decembro e o 7 de xaneiro e nas que colaboran, como é habitual, todos os colectivos culturais e sociais do municipio.
O cartel deste ano está deseñado por Iago Comedeiro, veciño de Bueu, e nel incídese na temática mariñeira.
Tras o acendido este xoves das luces de Nadal, un acto simbólico con chocolate para as persoas asistentes, haberá espectáculos de maxia, contacontos, cinema, actuacións musicais, obradoiros, deporte e moito máis.
Todas as actividades concentraranse maiormente na carpa de As Lagoas, pero tamén haberá diversas propostas no Centro Social do Mar e outros espazos das parroquias.
O público máis cativo será un dos grandes protagonistas da programación para estas datas.
Así, a Biblioteca Municipal Torrente Ballester acollerá este sábado 7 de decembro, ás 13 horas, a presentación do xogo Tes terras?, creado polos veciños bueueses Pedro Meira e Paula Pastoriza.
Na mesma biblioteca, o próximo 12 de decembro ás 17 horas, desenvolverase Arrolar, unha actividade da Fundación Legar que xirará arredor dos arrolos, nanas ou cantigas de berce, e que busca reforzar o vínculo afectivo entre as crianzas máis pequechas e as persoas adultas.
O sábado 14, a Libraría Abrente programará no Estaleiro de Purro co Universo de contos coa temática de Nadal, do que se poderá gozar ás 12 horas. Os contos continuarán o xoves 19 na Biblioteca Municipal de Beluso con As aventuras de Didi.
O 23 terá lugar no Centro Social do Mar ás 19.00 horas o espectáculo Pipí Cucú da compañía Assircópatas, unha proposta na que se fala da revolución dos soños e dos pesadelos. E o 27, ás 18.00 horas, virá á Casa da Aldea de Meiro o espectáculo O Apalpador e os monifates.
Haberá espectáculos de maxia co Mago Paco, o 30 de decembro ás 19 horas na carpa de As Lagoas, e o 2 de xaneiro, con Henriko - O feiticeiro no mesmo espazo e á mesma hora.
O programa inclúe unha sesión de cinema familiar, da que se poderá gozar o 26 de decembro a partir das 18 horas no Centro Social do Mar, cos filmes Polar Express e Medianoche en el jardín del bien y del mal.
Pola mañás do 21, 23 e 24 de decembro, o artista local Tino Resille impartirá entre as 11 e as 13 horas uns obradoiros de Nadal na carpa, no que os nenos e nenas de 7 a 12 anos farán diversas actividades artísticas e de decoración para estas datas.
Peter Punk voltará a Bueu o 31 de decembro para despedir coa cativada o ano, a través das "Badaladas miúdas” que gozaron de moito éxito nos anos previos. A actividade será ás 11.30 horas na carpa.
Xa a comezos de ano, o 3 de xaneiro será a tradicional xincana infantil organizada polos comerciantes de Bueu na carpa a partir das 17 horas. E o 4 de xaneiro, a Biblioteca Municipal de Cela acollerá ás 11 horas un obradoiro de Nadal co artista bueués Marc Taeger.
MÚSICA E FESTIVAIS DE NADAL
O Centro Social do Mar de Bueu, pola súa banda, acollerá este domingo 8 de decembro, ás 20.30 horas, Unha noite na eira do trigo de La Oca Band, un musical baseado no poema de Curros Enríquez e coñecido popularmente grazas á cantiga do grupo Los Tamara.
En Bueu, as rúas estarán amenizadas con música tradicional o 28 de decembro, con Cantos de taberna de Peis D’ Hos, e o 29, coa Rondalla de Zamáns. Así mesmo, dende Retrouso de Cela seguen coa recuperación do Bando de Nadal o 24 e o 25 polas rúas da parroquia de Cela.
E en canto aos festivais, o 14 de decembro ás 19.30 horas será o de Xa chega o Nadal da Coral Polifónica de Bueu, e o Festival Encanto da Coral Polifónica de Beluso na Igrexa Parroquial de Beluso. O 21, a Igrexa Parroquial de Cela acolle un concerto do Coro de Cela ás 19.30 horas, e a Banda de Música Artística de Bueu ofrece outro ás 20 horas no Centro Social do Mar.
O 28 será ás 20 horas o Festival Solidario da Asociación Española Contra o Cancro e tamén a festa de Amodiño no Pavillón de Bueu, e o 4 de xaneiro, á mesma hora, poderase gozar dun concerto de gospel, ambos no Centro Social do Mar.
O 14 haberá unha festa-baile en lembranza da mítica Sala Paraíso, que se celebrará na carpa de As Lagoas; e na madrugada do 31 de decembro, a orquestra Distrito 7 estará na carpa de As Lagoas para despedir o ano e darlle a benvida ao 2025.
E xa en Reis, a Asociación Cultural Santos Reis organiza a tradicional Romaría de Reis, na que actuarán o grupo Os Liboreiros e se degustará roscón con chocolate.
VISITAS DO APALPADOR, PAPÁ NOEL E OS REIS MAGOS
Como cada ano, os máis pequenos e pequenas recibirán as habituais visitas de Papá Noel, o Apalpador e os Reis Magos.
Papá Noel estará na carpa de Nadal situada no aparcadoiro de As Lagoas o 24 de decembro entre as 16.00 e as 19.00 horas, mentres que o Apalpador virá o 26 ás 11 horas.
Pola súa banda, o 5 de xaneiro está programado un recibimento cos Reis Magos que chegarán ás 11.00 horas ao peirao nas embarcacións tradicionais, como xa vén sendo habitual nos últimos anos, e recibirán logo aos nenos e nenas na carpa. Pola tarde, en torno ás 17.00 horas, sairá a cabalgata nun percorrido polas rúas do casco urbano.
O DEPORTE, TAMÉN PROTAGONISTA
Durante o Nadal organizaranse tamén dous torneos de xadrez co Club de Xadrez de Bueu: un deles destinado aos pequenos e pequenas o 21 de decembro ás 17 horas na Piscina Municipal de Bueu, e o outro, para adultos, será o 28 no mesmo espazo e á mesma hora.
O 29 de decembro, o Club de Atletismo Galaicas organiza a Carreira San Silvestre, que constará de andaina de 1,5 quilómetros e carreira de 2,5 quilómetros polas rúas da vila. As probas sairán ás 17.30 horas na contorna da carpa, e previamente haberá xincana infantil e máis actividades.
O Concello organiza tamén dous torneos de fútbol sala en formato 3x3. Serán o 3 de xaneiro ás 16.30 na multipista de As Lagoas para os nenos e nenas; mentres que ao día seguinte, ás 11 horas, desenvolverase o das persoas adultas.
E como cada ano, o 6 de xaneiro, Día de Reis, o Pavillón Municipal de Beluso acolle a partir das 16 horas un campionato aberto de billarda.
OUTRAS ACTIVIDADES
Este sábado, o Club Moteiros do Morrazo organiza a partir das 17 horas unha chocolatada moteira con diversas actividades na carpa e os colectivos de alfombristas da vila elaborarán tapices florais no Centro Social do Mar (martes 17) e na Sala Amalia Domínguez Búa (venres 20).
Así mesmo tamén haberá actos literarios da Libraría Miranda, como a presentación do libro Punto e coma do marinenseAarón Franco o 13 de decembro na biblioteca, e as sinaturas de exemplares de O Bichero de Luís Davila o 14, a partir das 11 horas na propia libraría.
O Cineclub pechará a programación de Nadal coa película Perfect Days o 13 de decembro ás 21 horas no Centro Social do Mar e o 21 de decembro, o Pavillón de Beluso acollerá un mercado de Nadal organizado por Asbel, Novos Ventos e Asociación Cultural de Sanamedio.