É unha cita xa habitual, e non por iso deixa de estar chea de ilusión e boas intencións.
O Complexo Hospitalario Universitario de Pontevedra (CHUP) recibiu a visita de varios membros da Asociación Cultural Deportiva Bombeiros de Pontevedra.
Unha visita na que os profesionais de extinción de incendios fixeron as delicias dos máis pequenos, nenos e nenas ingresadas na área de pediatría do Hospital Provincial.
A súa entrada de feito non puido ser máis espectacular, despregando desde o exterior un dos seus camións de intervención.
Así lograron acceder a unha das xanelas do segundo piso, entrando no edificio usando unha escaleira articulada.
Alí esperaban algúns dos nenos e nenas ingresadas, recibindo agasallos e coñecendo tamén de primeira man todo o material de atención das emerxencias.
Os integrantes da Asociación Cultural Deportiva Bombeiros de Pontevedra achegáronse tamén até un dos hospitais de día para visitar aos enfermos.
Unha xornada solidaria que tamén gozaron os familiares e a profesionais da área sanitaria.