Chega unha nova entrega da serie "A cociña gourmet en conserva" cunha orixinal proposta idónea para o tempo de Nadal: a sopa ‘bisqué’. Unha deliciosa receita para a que Conservas Pescamar achéganos un dos produtos estrela da cociña atlántica: o berberecho.
A ‘bisqué’ é unha sopa cremosa orixinaria de Francia, elaborada con carcasas e cabezas de mariscos, e á que se lle adoita engadir viño branco e nata. É un dos pratos que non debe faltar como entrante no menú de Nadal.
Os berberechos son moluscos altamente nutritivos, grazas á súa achega en ferro. O seu baixo contido en graxas e gran porcentaxe de proteínas, convértenos nunha perfecta alternativa ás carnes.
Para preparar unha saborosa 'Bisqué' de Nadal con torta de berberechos Pescamar, necesitamos os seguintes ingredientes:
- Ingredientes para a crema:
- Líquido da lata de berberechos ao natural Pescamar
- 200 g de gambas
- 1 cebola
- 1 feixe de allos tenros
- 1 feixe de porros
- 2 patacas
- 150 ml de nata líquida para cociñar
- 1 cullerada de pemento doce
- Sal
- Aceite de oliva
- 1 chorro de coñac
- 1 vaso de viño branco
- Ingredientes para as tortas de berberechos:
- 1 lata de berberechos ao natural Pescamar
- Gambas cocidas que reservamos na preparación da crema
- 2 ovos
- Faragulla de pan
- 1 tomate relado sen pebidas
- Allo en po
- Sal
- Aceite de oliva virxe extra
Preparación da 'bisqué':
Cocemos as gambas enteiras cun chisco de sal. Retiramos do lume e pelámolas. Reservamos. Introducimos as cabezas e o cacho na auga, engadimos o líquido da lata de berberechos ao natural Pescamar e volvemos cocer ata obter un caldo consistente.
Á parte, refogamos en aceite de oliva, previamente cortados en pequenos anacos, os allos tenros, os porros, a cebola e as patacas. Vertemos o coñac, o viño branco e a auga de cocer as gambas, tras pasala por un coador, e deixamos ferver 30 minutos.
Transcorrido este tempo, pasamos o contido da cazola polo coadoiro chinés, levámolo de novo a ebulición e salpementamos. Engadimos aos poucos a nata ata acadar a consistencia cremosa desexada.
Preparación das tortas de berberechos:
Nun bol mesturamos os ovos batidos, os berberechos ao natural Pescamar, as gambas, o tomate relado, o allo en po e o sal. A continuación, imos engadindo a faragulla de pan e mesturando ata obter a consistencia que desexemos para as tortas.
Estiramos a masa nunha superficie plana e cun molde cilíndrico pequeno, ou mesmo unha cunca, imos formando tortas redondas. Unha a unha ímolas fritindo no aceite.
Presentación:
No prato de cada comensal colocamos unha torta e por riba servimos a 'bisqué'.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.