A concellería de Benestar Social de Pontevedra, dirixida por Anabel Gulías, vén de lanzar catro novos cursos de Formación Adaptada e Participación Social na Casa Azul.
Esta iniciativa busca dar resposta ás necesidades educativas de persoas en situación de vulnerabilidade que procuran acceder ou reintegrarse ao mundo laboral, mellorar o seu emprego e afastarse do risco de exclusión.
O obxectivo é mellorar a formación, facilitar a inserción laboral e promover a sociabilidade dos participantes.
Os catro itinerarios formativos ofertados son:
ESA (Educación Secundaria para Adultos): Apoio educativo para persoas matriculadas na EPA ou que optan ao exame libre de ESO.
Competencias Clave 2: Inclúe formación en Lingua Castelá, Lingua Galega, Matemáticas e Inglés. Ao superar este nivel, equivalente a 2º da ESO, os alumnos poden acceder aos cursos de familias profesionais do SEPE.
Competencias Clave 1-B: Céntrase en habilidades sociais, comprensión lectora e expresión oral.
Competencias Clave 1-A: Dirixido a persoas que precisan alfabetización ou inmersión lingüística e cultural.
Actualmente, hai arredor de cincuenta persoas matriculadas nestes cursos.
Entre eles atópanse persoas que abandonaron os estudos antes de rematar a ESO, aquelas que necesitan adquirir competencias clave para acceder a cursos do Servizo de Emprego, e outras que precisan mellorar as súas habilidades sociais e lingüísticas para integrarse no mundo laboral.