O Refuxio de Animais de Cambados fixo público un novo episodio de malos tratos animais descubertos esta semana xunto a axentes da Policía Autonómica nunha leira de Meis.
A colaboración veciñal revelou que nesta leira situada no lugar da Rochela, na parroquia de San Vicente de Nogueira, atopábase un cabalo en avanzado estado de desnutrición e había outros dous xa mortos, que xeraban un cheiro nauseabundo na zona.
A presidenta do Refuxio de Animais de Cambados, Olga Costa, anunciou que denunciarán ao propietario por malos tratos animais.
Esta mesma intención expresaron as organizacións animalistas, Libera e Fundación Franz Weber para que inhabiliten a ese gandeiro para ter animais, porque xa tivo problemas similares noutras ocasións.