Polas palmeiras do ámbito de Gutiérrez Mellado, onde hai uns 24 exemplares, comezaron este mércores os traballos de mantemento que o goberno municipal de Pontevedra decidiu impulsar nestas árbores, máis de setenta en toda a cidade.
Estes labores permitirán quitar as follas secas na copa destas palmeiras e limpar as vainas dos seus troncos, traballos que segundo o edil de sostemento de espazos públicos, Xaquín Moreda, son "complexos" ao ter que facerse con plataformas elevadoras.
En Gutiérrez Mellado "é máis doado", explicou Moreda, porque os traballos apenas interrompen o tráfico, pero isto cambiará cando toque arrombar as vinte palmeiras de Sagasta ou as trinta que hai no ámbito da Avenida de Vigo e Andrés Mellado.
Alí, en coordinación coa Policía Local, haberá cortes de tráfico, teranse que retirar os contedores e haberá que valar a zona para garantir a seguridade dos peóns.
"Estes eran uns traballos demandados pola cidadanía", sinalou o concelleiro do BNG, que recoñeceu que, a pesar de que este labor débese facer cada certo período de tempo, "levábamos tempo sen actuar sobre elas".
Ás cuestións estéticas que motivan este mantemento, o edil sumou a necesidade de ofrecer máis seguridade aos peóns, xa que nos últimos temporais desprendíanse as follas. Ademais, búscase contribuír a mellorar a calidade de vida destas palmeiras.
Estes traballos custarán uns 17.525 euros.
Fóra deste mantemento queda a Alameda, porque xa está a experimentar o seu propio proceso de poda e de mellora das árbores. Os técnicos están a estudar ademais o seu estado para ver cales están enfermos e poderían ser tallados. Isto non afectará a ningunha palmeira.