Por fin hai data para o inicio dos traballos para a reforma integral do Nó de Bombeiros e do acceso norte á autoestrada AP-9. As obras comezarán o vindeiro luns 15 de xullo, segundo avanzou o edil César Mosquera, responsable municipal da área de ordenación urbana.
Esta intervención arrancará cunha serie de actuacións para as que non será necesario interromper o tráfico na zona, para evitar crear complicacións na circulación nunha época tan sensible como os meses estivais.
Así, iranse acumulando materiais e recheos na zona próxima ao actual parque canino da Xunqueira de Alba e iranse sinalizando todas as actuacións que se deban abordar.
Mosquera explicou que, de entrada, haberá que habilitar unha rampla desde Domingo Fontán para que os camións poidan acceder a toda esta zona para facer os recheos.
Ademais, cortarase o paso peonil por baixo da rotonda cara á Xunqueira de Alba e, eventualmente, quedará inutilizado o parque canino.
"Hai unha orde directa de Madrid de que a obra hai que empezala si ou si", sinalou o concelleiro pontevedrés, que explicou que estes primeiros pasos irán en paralelo aos "axustes" que sufrirá o proxecto, sobre todo en materia de cimentación.
Desde o Concello aseguran ter "todo organizado" ante o inicio desta esperada actuación, aínda que esperarán a recibir un plan de obra máis concreto para organizar posibles alternativas para a circulación rodada, especialmente cando se aborde o "punto crítico" para o tráfico, a reconstrución da rotonda norte do Puente dos Tirantes.
César Mosquera entende que se hai que cortar o tráfico na súa totalidade, a circulación terá ser desviada cara ao sur da cidade e empregar a autoestrada como principal vía de acceso, pero confía en que as obras poidan compatibilizarse co uso dos viais actuais.
O Ministerio de Transportes, Mobilidade e Axenda Urbana investirá 9,55 millóns de euros nestas obras de remodelación do Nó de Bombeiros.