Pontevedra xa ten garantido o alumeado das festas durante o Nadal. O Concello acaba de aprobar a adxudicación do contrato para esta iluminación por un importe de 144.595 euros.
A empresa adxudicataria é Creaciones Luminosas, con sede en Tui, que tamén se encargará do alumeado das Festas de Verán do vindeiro ano por un importe de 36.179 euros.
O prego de condicións detalla que as luces deben estar instaladas, como moi tarde, o 6 de decembro.
Este xoves, o alcalde, Miguel Anxo Fernández Lores, deu a coñecer a adxudicación e lembrou que "historicamente" o alumeado de Nadal de Pontevedra adoita inaugurarse xusto antes da ponte festiva dos días 6 e o 8 de decembro.
Este ano, polo tanto, a data prevista sería a do xoves 5 de decembro. "Esa, en principio, é a previsión", asegurou Lores.
A Xunta de Goberno deste xoves tamén aprobou a adxudicación do alumeado do Entroido á empresa Tecmodeco, con sede en Vilagarcía de Arousa, por 16.940 euros.