Durante a tarde deste venres aínda se estaban instalando algúns dos postos de venda na zona das Palmeiras e algunhas das tómbolas na Alameda. As espectaculares atraccións xa se atopan en funcionamento na avenida Raíña Vitoria e a espectacular nora na contorna do edificio administrativo da Deputación.
Precisamente, por primeira vez nas Festas da Peregrina os nenos e adolescentes de familias en risco de exclusión dispoñerán de "pases" gratuítos para as atraccións da feira. A petición de Marea Pontevedra, esta decisión apoiouse nun pleno e as 26 empresas que participan nestas festas entregaron máis dun milleiro de fichas para que os usuarios, a través da Fundación "Meniños", poidan empregalas.
A lectura do pregón a cargo do escritor Rodrigo Cota coa tirada dun chupinazo desde o balcón do Pazo de Mugartegui ás 12.00 horas deste sábado 13 servirá para dar inicio á semana grande das Festas da Peregrina.
A continuación un pasarrúas a cargo de diversas agrupacións folclóricas percorrerán as rúas do centro de Pontevedra. Ás 13.15 trasladarase a carroza procesional desde a praza de España pola rúa Michelena ata o santuario da Virxe Peregrina.
Ás 14.00 horas entregaranse os premios Amigos de Pontevedra e xa durante a noite celebrarase o concerto de Dorian e de La Casa de los Ingleses na praza de España a partir das 22.30 horas. Un cuarto de hora máis tarde comezará a verbena en Montero Ríos coas orquestras Paraíso e Formas.
Finalmente, está previsto que se realice a tirada de fogos artificiais a partir das 24.00 horas no peirao de Corbaceiras. O cambio da dirección do vento garante a seguridade deste evento, que corría perigo se seguise presente o vento do nordés.