Ás 7.30 horas deste martes o incendio dun coche na metade da ponte de Rande complicou o acceso á cidade de Vigo a numerosas persoas que circulaban pola autoestrada AP-9 a esas horas da mañá. As retencións prolongáronse ata as 8.30 horas, aproximadamente.
Cando a Garda Civil de Tráfico acudiu ao lugar do sinistro atopáronse ilesos aos dous ocupantes do automóbil accidentado. Os axentes do subsector de Tráfico de Pontevedra procederon á detención destes dous individuos cando se afastaban andando do seu coche en lapas.
Segundo informaron fontes oficiais do instituto armado, o condutor foi detido como presunto autor dun delito contra a seguridade viaria, igual que o seu acompañante, xa que antes do incendio do turismo estiveron a facer "trompos" co seu coche en Poio.
Ademais ao condutor fóralle retirado o permiso de condución nunha sentenza xudicial.
Os Bombeiros do Morrazo extinguiron o incendio. O coche quedou totalmente calcinado despois de circular a gran velocidade e durante un longo treito cunha roda picada.
Estes dous homes, residentes en Vigo, foron postos xa en liberdade.