O goberno local de Poio convocou para o vindeiro martes, 10 de decembro, o Consello de Participación Veciñal co obxectivo de recoller achegas cidadás para a elaboración dos orzamentos municipais do próximo ano.
A xuntanza, segundo anuncian desde o goberno municipal, terá lugar no salón de plenos da Casa do Concello ás 19.30 horas.
O encontro, que contará coa presenza de representantes dos grupos municipais e das asociacións veciñais locais, enmárcase na aposta do executivo local polo diálogo e a participación cidadá.
"Somos un Goberno que escoita e queremos coñecer as opinións da veciñanza sobre un documento prioritario que marcará a acción e xestión dos próximos doce meses", sinalou o alcalde Ángel Moldes.
O rexedor adiantou que, tras o orzamento de transición de 2024, as contas de 2025 non contemplarán operacións de endebedamento.
Moldes afirma que o documento de 2024 permitiu sanear as arcas sen afectar á prestación dos servizos municipais-,
Ademais, incluirán unha redución nos impostos dos vehículos e dos vados, así como bonificacións no IBI para as familias numerosas do municipio, mantendo conxelado o resto de tributos, explican desde o goberno local.
O Consello de Participación Veciñal acolle colectivos veciñais para que emitan propostas e abran debates sobre o municipio en relación coas necesidades das parroquias e de distintos sectores sociais.