A agrupación política Anova trasladará a Unión Europea, a través da súa eurodeputada Lidia Senra, unha petición para que se investiguen as emisións que se realizan por parte da depuradora nas proximidades da illa de Tambo a través do emisario submarino.
Indican que son numerosas as queixas pola cantidade de elementos que emerxen na zona na que se encontra localizado o emisario. Aseguran que se produce unha especie de volcán que emite millóns de partículas con papeis, bólas de graxa, aceite e outros elementos, que detectaron, en tres ocasións durante o último mes.
Claudio Quintillán denuncia o silencio por parte dos Concellos de Pontevedra, Poio e Marín derivado, segundo dixo, do temor ás consecuencias que podería ter facerse eco desta situación para o sector marisqueiro da ría de Pontevedra. Por este motivo, entenden que a Xunta tería que aumentar o número de análise xa que, segundo Quintillan, se realizan trimestralmente os de residuos mentres que os de químicos e biolóxicos son anuais.
Dende Anova entenden que a Unión Europea debería realizar inspeccións sorpresa e comprobar tamén a influencia que ten Ence nesas verteduras. Claudio Quintillán reclama un control exhaustivo porque a factoría pasteira conflúe tamén na depuradora.
DEPURADORA EN POIO
En relación coa instalación dunha estación depuradora en Poio, Anova reclama unha planificación previa e buscar unha fórmula de consenso para poder dotar deste servizo o municipio, ante a oposición veciñal ao proxecto no ámbito de Laño, en Samieira.
Quintillán é partidario de que se instale nunha zona de monte pero o custo que supón provocou que se desestime esta posibilidade, segundo apuntou. O voceiro de Anova, Daviz Carballal, sinalou que é máis prexudicial para a imaxe turística que se peche ao baño unha praia, como sucedeu coa de Laño e Raxó este verán, que a implantación dunha estación depuradora.