O vicepresidente da Deputación, César Mosquera, realizaba nas últimas horas un balance dos tres anos de cogoberno na institución provincial entre o PSOE e o BNG. A súa análise positiva contrasta co resumo que realiza o portavoz do Partido Popular, Ángel Moldes deste período.
Moldes considera que Mosquera ten o goberno completamente idealizado e que está a describir o que lle gustaría ser e facer durante este tempo. Os populares entenden que a realidade da provincia é "diferente".
Ao representante do PP chámalle a atención que Mosquera sempre faga estes balances cando a presidenta Carmela Silva se atopa de vacacións e entende que se debe a que é o único momento en que os nacionalistas non se atopan tutelados polo PSOE.
Ademais, Moldes indica que aqueles aspectos destacados polo vicepresidente provincial no seu balance son os que "peor están a funcionar". Asegura que o Plan Concellos está a espertar críticas dos alcaldes polas cantidades económicas e pola repartición que se realiza. Sinala que hai favoritismos e discriminación cara aos concellos onde goberna o PP e afirma que o goberno bipartito non recibe a alcaldes populares.
En relación co Plan Revitaliza critica que Pontevedra sexa a provincia galega na que aumentan os residuos que se depositan na bolsa negra e que sigan sen eliminarse os contedores verdes como esixía o goberno provincial.
Por último, lamenta que César Mosquera presuma dos "lombos" pero que non atenda as achegas e suxerencias que fan os técnicos de asistencia sanitaria.