Jorge Canda e Andrés Díaz acaban de facer historia nos seus respectivos municipios.
No caso de Andrés Díaz ao ser o primeiro socialista en ser investido alcalde en Ponte Caldelas.
Ao sumar o PSOE os votos dos edís do BNG e da Agrupación Veciñal de Ponte Caldelas (AVP) púidose pechar unha etapa de 24 anos de gobernos do Partido Popular.
O novo rexedor asegurou tomar esta nova responsabilidade con "humildade" e prometeu aos veciños de Ponte Caldelas "dedicación e esforzo" nesta tarefa.
Andrés Díaz contou co apoio dun numeroso grupo de veciños e simpatizantes do tripartito que formará o novo goberno coaligado da vila.
A LAMA
Pola súa banda o popular Jorge Canda conseguiu reter o bastón de mando nas mans do Partido Popular na Lama ao tempo que cumpre vinte anos á fronte da corporación local.
Na sesión de investidura, Jorge Canda agradeceu a confianza depositada nel e o seu equipo por parte dos seus veciños, por quinto mandato consecutivo, e marcouse o reto de gobernar para poder recuperar o concelleiro que perdeu para as eleccións dentro de catro anos.