Unha decena de alumnos de quinto e sexto do Colexio de Primaria e ESO Juan Sebastián Elcano, de Pontevedra, recibiron este luns os carnés de “ciberexperto”.
O alumnado deste colexio do Ministerio de Defensa superou as accións formativas sobre ciberseguridade enmarcadas no Plan Director para a Seguridade e a Convivencia nos Centros Educativos.
O subdelegado do Goberno en Pontevedra, Abel Losada, acompañado polo director do centro educativo, o capitán de navío Ignacio Santamaría, felicitou ao alumnado pola superación deste curso, recalcando a importancia de coñecer non só as vantaxes, senón tamén os riscos que implican o uso das tecnoloxías.
Durante o acto, no que participou tamén o inspector-xefe Luis Velayos e o equipo do Plan Director da Comisaría de Pontevedra, ademais do persoal docente, Losada animou aos nenos a transmitir os coñecementos adquiridos sobre os perigos da ciberdelincuencia ao resto de alumnado do colexio, así como ao seu entorno familiar, especialmente aos seus pais e nais e avós e avoas.