Adxudicada por 826.000 euros a primeira fase da reforma da estrada vella de Marín

Pontevedra
09 de novembro 2022

A intervención centrarase na zona de Estribela, dispón dun prazo de execución de 12 meses e inclúe a ampliación das beirarrúas, a instalación de tres pasos de peóns sobreelevados, a mellora das paradas de autobús e a reposición de todos os servizos e da sinalización

Ethel Vázquez e Miguel Anxo Fernández Lores, na PO-546, a estrada vella de Marín Mónica Patxot

A Xunta vén de adxudicar por máis de 826.000 euros a primeira fase do acondicionamento da estrada PO-546, entre Pontevedra e Marín, na zona de Estribela.

A actuación, que foi adxudicada á empresa Oresa Construcción y Servicios Globales S.L., ten un prazo de execución de 12 meses.

O obxectivo das actuacións é garantir desprazamentos sen riscos na zona e que os peóns gañen máis protagonismo fronte ao vehículo, mellorando a súa seguridade.

Para iso, a Xunta acometerá unha transformación integral da estrada nesta contorna, coa reurbanización dun treito de 500 metros, no que se modificará a sección transversal para poder ampliar as beirarrúas e dotalas dun ancho mínimo de dous metros, de forma que se favorezan os desprazamentos a pé e se asegure a accesibilidade.

Ademais, para conseguir o calmado de tráfico e reforzar a seguridade viaria, instalaranse tres pasos de peóns sobreelevados que contarán con iluminación específica e cun sistema intelixente que detecte ao peón nas inmediacións e active a sinalización.

Tamén se mellorarán as paradas de autobús, coa disposición de novos refuxios e renovarase a iluminación da vía, ademais do fresado e estendido dunha nova capa de firme, a reposición da drenaxe e dos servizos afectados e a sinalización horizontal e vertical.

Esta intervención contará con fondos do Mecanismo de Recuperación e Resiliencia do programa Next Generation UE de mobilidade sostible.

A actuación forma parte dun proxecto máis amplo, unha intervención no conxunto da vía coa que a Xunta busca promover unha mobilidade máis saudable, sostible e segura, tanto a pé como en bicicleta.

En total, a Xunta investirá 7 millóns de euros para a transformación da PO-546, que continuará entre Mollabao e Os Praceres e seguirá cun novo treito entre Estribela e o límite con Marín, ademais da zona pendente de mellora da rúa Concepción Arenal, tamén en Marín.