Chegan boas novas dende terras do Deza para Panadería Acuña.
Este mes de agosto, na plantación que a firma pontevedresa ten no lugar de Galegos (Lalín) acaba de concluír a segunda colleita de trigo autóctono variedade Caaveiro.
A sementeira realizábase en febreiro e, seis meses despois, os resultados son moi satisfactorios.
En total, obtívose un rendemento de 8.540 quilos de cereal.
A principios deste ano, a empresa capitaneada polos curmáns Andrés e Jacobo Acuña daba un paso adiante nesta plantación experimental ampliando nunha hectárea máis o terreo cultivable.
Da man do produtor local Miguel Pampín pasábase de tres a catro hectáreas de cultivo de trigo Caaveiro 100% galego en terras lalinenses.
Tamén se optou por enriquecer o terreo con fertilizante verde a base de plantas, co que se asegura a sustentabilidade do cultivo.
O pasado ano, a primeira colleita tamén obtivo uns resultados moi positivos, que apoiaban a viabilidade do proxecto de recuperación do trigo autóctono.
Con estes bos antecedentes, para o ano 2024 as expectativas eran altas. Con todo, un elemento que coñecen moi ben as xentes do campo, a climatoloxía, xerou moita incerteza.
"Este ano foi moi complicado, estivo a chover todo o inverno e case toda a primavera, ata maio. A planta de trigo sufriu moitísimo. Nun primeiro momento vimos que non desenvolvía, non sabiamos que ía suceder ata que no mes de xuño empezou a prender a planta", explica Andrés Acuña.
O obxectivo era alcadar os 10.000 quilos de trigo, unha marca que esperan lograr en próximas colleitas. "Estamos moi satisfeitos", asegura Acuña.
A experiencia destes dous anos demostrou que o trigo autóctono é especialmente resiliente e confirma que plantacións como a de Acuña en Lalín son o mellor exemplo do potencial de Galicia para producir cereal.
Tamén o consumidor aprecia que haxa empresas apostando polos produtosQuilómetro Cero e artesáns, un valor diferencial que xa é marca da casa de Panadería Acuña.