A Xunta autorizou na reunión do Consello celebrada este mércores o acordo de cesión entre o Servizo Galego de Saúde (SERGAS) e a Comunidade de Montes Veciñais en Man Común de Mourente para a ocupación de uso de espazos con destino ao Hospital Montecelo.
En virtude do acordo, a Mancomunidade de Montes de Mourente cede con carácter indefinido ao Sergas o uso dos terreos actualmente ocupados polo hospital, o que supón a regularización da situación das instalacións do complexo sanitario, logo de que unha sentenza xudicial recoñecera á comunidade como titular deste chan.
Ante esta situación a Xunta negociou con esta entidade un acordo de cesión. Deste xeito, a administración autonómica aboará un canon anual por importe de 23.583 euros á Comunidade de Montes de Mourente para "salvagardar a prestación sanitaria nas instalacións actuais e garantir o mantemento do uso dos terreos actualmente ocupados polas instalacións do Hospital Montecelo".
O acordo tamén garante a continuidade dos servizos asistenciais e as instalacións anexas.
O Sergas poderá realizar nestes terreos todas as instalacións, construccións, edificacións e melloras vinculadas ao destino da parcela que sexan necesarias para a atención sanitaria da poboación da súa área, o que supón o mantemento da atención sanitaria á poboación que se ven prestando ata o momento.
Polo tanto, a poboación da área sanitaria non se verá afectada polo recoñecemento da titularidade dos terreos a prol da Comunidade de Montes Veciñais xa que o acordo mantén a plena dispoñibilidade por parte do Sergas, e seguen vixentes os proxectos de mellora e desenvolvemento da asistencia sanitaria da área.