A conselleira de Medio Ambiente, Territorio e Vivenda, Ángeles Vázquez, entregou este martes 8 das 10 vivendas reformadas, xa que dúas delas foron entregadas anteriormente. A Xunta investiu 720.000 euros na rehabilitación de antigas casas de mestres para ofrecer en alugueiro en Cerdedo-Cotobade.
Logo de agradecerlle ao Concello ter cedido gratuitamente estes inmobles, a conselleira puxo en valor que estas vivendas terán unha renda mensual de entre 88 e 106 euros.
Cada unha delas conta con preto de 84 metros cadrados útiles, distribuídos en dúas plantas e con dous dormitorios. Ademais, son vivendas eficientes desde o punto de vista enerxético ao contar cunha bomba de calor de aerotermia para calefacción e auga quente.
Ángeles Vázquez salientou que Xunta segue a apostar pola vivenda pública en Galicia, "neste momento promovemos o remate e construción dun total de 512 vivendas de promoción pública cun investimento de 72,5 millóns de euros, principalmente nas grandes cidades galegas".