A concellería de Patrimonio e Memoria Histórica puxo en marcha o pasado mes de abril, dentro do programa 'A Memoria das Mulleres', un ciclo de creación e divulgación de pezas audiovisuais da man de tres creadoras galegas.
Nesta ocasión, María Rúa (@pradorua), Helena López (@cousasrarismas) e Sara Seco (@sarasecorial) foron as escollidas para divulgar as diferentes biografías de mulleres presentes na web www.dogrisaovioleta.gal.
Hai apenas un par de días, foi a estrea nesta tempada de Sara Seco, que publicou o seu vídeo adicado á vida de Rosa Malvar Sanmartín, pontevedresa que comezou vendendo rosquillas e licores nas feiras coa nai, mais logo aprendeu a coser e andou de costureira polas casas. Aos 30 anos, no camiño de volta do traballo, caeulle ao chan a máquina de coser que levaba na cabeza e interpretou o feito como un aviso das ánimas para actuar de intermediaria. Desde ese intre exerceu como curandeira e adiviña.
Na peza audiovisual, a creadora aposta por mesturar conceptos como a divulgación narrada ao tempo que elabora unhas rosquillas coa idea de que a xente poida emular a receita e faga tamén na casa a mesma sobremesa, homenaxeando as rosquillas que Rosa Malvar Sanmartín vendía no seu primeiro treito de vida.
O vídeo está a gozar dun éxito evidente, con case 17 mil reproducións xunto con ducias de comentarios e centos de interacións; amais de se compartir noutras redes sociais alén da plataforma orixinal na que foi publicado, TikTok.
Nado no ano 2013, da man do Concello de Pontevedra, o proxecto 'A Memoria das Mulleres' ten como finalidade construír, de modo colectivo e cooperativo, un fondo documental, gráfico e audiovisual da historia das mulleres en Pontevedra.