O Instituto Galego de Vivenda e Solo (IGVS) inicia as obras da segunda fase do proxecto de recuperación das antigas vivendas dos mestres de Cerdedo, nas que inviste 700.000 euros e que consisten na restauración das oito casas restantes despois de que o pasado ano culminasen a rehabilitación das dúas primeiras, da cuberta do inmoble e dos espazos comúns.
A actuación supón basicamente a continuidade da primeira fase, que xa permite que dúas familias gocen dos seus fogares baixo o formato de aluguer social. Habilitarán estas oito casas con salón, cociña, cuarto de baño e habitacións, dotados de todos os servizos, xunto cun pequeno xardín nas súas respectivas partes traseiras, con vistas á remodelada pista multideporte anexa ao colexio público San Xoán Bautista.
Tras esta rehabilitación, que se acometerá ata mediados do próximo ano 2021, comezará a tramitación administrativa para a súa catalogación como Vivendas de Promoción Pública ( VPP) e a súa posterior concesión aos beneficiarios co réxime de arrendamento de carácter social.
O alcalde de Cerdedo-Cotobade, Jorge Cubela, agradeceu a sensibilidade da Xunta coas políticas de vivenda impulsadas desde o Concello, mostrou a súa confianza en que as obras se desenvolverán sen atrancos e cumprindo os prazos, xa que pretende que estas oito vivendas restauradas sexan estreadas por outras tantas familias no Nadal do 2021.
A este proxecto, súmase outro xa bastante avanzado para crear outras catro vivendas sociais coa restauración do antigo centro médico de Carballedo.