O descenso da incidencia da covid-19 na área sanitaria de Pontevedra e O Salnés acelérase. Hai 114 casos activos menos que onte, segundo o balance do Servizo Galego de Saúde. O número de persoas que teñen a infección activa sitúase en 2.027.
Iso si, os contaxios novos seguen sendo medianamente elevados. Nas últimas 24 horas, rexistráronse infectados 83 máis nos PCR e cribados que se están realizando sen descanso.
A presión asistencial tamén se aliviou, especialmente nas plantas de hospitalización. Nelas hai 100 pacientes ingresados con coronavirus, catorce menos que o día anterior.
A maior parte dos hospitalizados (84) están en sendo atendidos en Montecelo. Outros seis están no Hospital do Salnés e hai dez no QuirónSalud Miguel Domínguez de Pontevedra.
Os pacientes máis graves, que están ingresados na unidade de coidados críticos (UCI) de Montecelo, son 20 nestes momentos, segundo os datos achegados polo Sergas. É a mesma cifra de críticos que había onte.
O resto dos que contraeron o virus, outras 1.907 persoas, atópanse illadas nos seus domicilios e recuperándose baixo supervisión médica.
Desde o inicio da pandemia 9.469 pacientes da área sanitaria superaron a covid-19, 197 nas últimas 24 horas, e rexistráronse 135 falecementos asociados ao virus.
En canto á realización de probas PCR, fixéronse na área sanitaria de Pontevedra e O Salnés un total de 153.871, 945 nas últimas horas. Delas, 68 deron positivo (7,19%). A estas probas súmanse as 67.480 seroloxías realizadas ata a data.
INCIDENCIA EN GALICIA
A nivel autonómico a Dirección Xeral de Saúde Pública informa que o número de casos activos de coronavirus en Galicia é de 15.894, 749 menos que o día anterior. Deles 4.590 son da área da Coruña, 1.437 da de Lugo, 1.569 da de Ourense, 2.027 da de Pontevedra, 2.626 da área de Vigo, 2.188 da de Santiago e 1.457 da de Ferrol.
Do total de pacientes positivos, 226 están en UCI, 856 en unidades de hospitalización e 14.812 no domicilio. Por agora, en Galicia hai un total de 89.832 persoas curadas, rexistrándose 2.056 falecementos.
Desde o inicio da pandemia realizáronse en Galicia 1.556.867 probas PCR, 9.739 nas últimas 24 horas, que permitiron detectar a 603 novos infectados.