Os miles de participantes que, como cada ano, ían participar na Pontevedrada, a marcha solidaria a pé entre Pontevedra e Santiago pola doazón de sangue, órganos e tecidos, terán que esperar. A organización decidiu aprazala como medida de prevención.
A Asociación de Amigos da Pontevedrada (ASAMPO) entende que debe acatar as recomendacións das autoridades e considera que non será posible a súa celebración na data prevista, o sábado 25 de abril.
ASAMPO lembra que esta marcha ten un alto índice de asistencia de persoas, non só de Galicia senón de todo o territorio nacional, o que amplía o risco para a saúde pública.
Con todo, todas as persoas rexistradas ata o momento na décima edición da Pontevedrada conservarán as súas inscricións, a falta de coñecer a data definitiva da proba. O prazo de inscrición ao evento solidario continuará aberto.
No momento en que as autoridades competentes consideren oportuno levantar a actual situación global polo COVID- 19, a organización anunciará publicamente a nova data.
Desde ASAMPO piden desculpas ás molestias que poida provocar este aprazamento, pero afirman que o pais "vive un momento moi delicado" e, nestes momentos, "a saúde é o máis importante".