Grazas á difusión nos medios e nas redes sociais, foi posible dar cos responsables e recuperar un cabrito que fora roubado nunha leira situada na rúa Antelo e Mariño.
O animal atópase en perfecto estado, segundo informou a Policía Local de Poio.
As pescudas permitiron tamén a identificación de dous mozos, un de 19 anos, veciño de Poio, e outro menor de idade, veciño de Pontevedra, que o pasado venres fuxían á carreira co cabrito de apenas mes e medio de vida.
Os mozos recoñeceron os feitos como unha falcatruada.
Unha vez finalizadas as dilixencias serán trasladadas pola Policía Local ao Xulgado e a Fiscalía de Menores por un presunto delito de roubo do animal.