Gilmar Piolla, o secretario municipal de Turismo de Foz de Iguazú, visitou este mércores Pontevedra para coñecer o modelo urbano coa intención de trasladar ideas aplicadas na cidade de Lérez a este punto turístico situado no oeste do estado de Paraná, unha localidade brasileira que conta coa presenza de tres millóns de turistas cada ano.
Piolla que percorreu o centro urbano acompañado polo alcalde Miguel Anxo Fernández Lores indicou que se trata dunha cidade "moi agradable, moi humana" e esa é a idea que queren trasladar para Foz de Iguazú, un espazo coñecido polas súas espectaculares cataratas.
O secretario municipal de Turismo visitou Pontevedra procedente e Termatalia-2017 que se celebra en Ourense, acompañado polo empresario e xerente de Convention Iguazú, Altino Voltolini. Mantiveron un encontro co director xeral de Urbanismo, Xosé Manuel Tato, para coñecer como se estableceu a transformación urbana de Pontevedra, que foi recoñecida con diversos premios internacionais.