O Concello de Poio abre o proceso de licitación para adxudicar a mellora na contorna de Anafáns, na parroquia de San Salvador.
O orzamento total da obra está cifrado en máis de 220.000 euros, que se financian a través do Plan Concellos da Deputación de Pontevedra.
O concelleiro de Urbanismo e Promoción Económica, Gregorio Agís, informou que esta actuación dará continuidade á batería de traballos que xa se están levando a cabo noutros núcleos de relevancia da parroquia de San Salvador, como son Adro-A Porteliña ou Portosanto-Saíñas-A Puntada.
Ao igual que nestes proxectos, en Anafáns tamén se apostará por dar prioridade á seguridade peonil, ao tempo que se habilitarán novas prazas de aparcamento nas proximidades do Centro de Saúde. Ademais, procederase á ampliación da vía. "Consideramos de vital importancia sacar adiante este proxecto, habida conta da necesidade de rehabilitar unha área de tanta importancia como é a contorna de Anafáns, non só polo emprazamento do Centro de Saúde, senón tamén por acoller a un gran número de residentes e de establecementos e negocios de todo tipo", sinala o responsable de Urbanismo e Promoción Económica.
O edil recorda que, unha vez que comecen as obras, haberá a disposición das persoas residentes un aparcadoiro disuasorio, que, de feito, xa se está a utilizar para dar servizo desde o inicio dos traballos de mellora que se están levando a cabo no Adro e na Porteliña.
Por outra banda, Gregorio Agís tamén visitou este luns a Praza Alfredo Romay, na parroquia de Samieira, onde o Concello está levando a cabo tarefas de mantemento e reparación nalgunhas zonas deste emblemático espazo público. "Detectamos unha serie de deficiencias que xa se están a arranxar, para que este punto de encontro habitual da veciñanza estea nas melloras condicións", sinalou o socialista.